Scannáin - Moladh agus Cáineadh

topper75

An-leadránach. Téigigí go ceann eile.

Cad is brí leis an damhsa ag an deireadh? Magadh an ea? Scannáin le gach rud ann agus ní raibh faic ann i ndeireadh na dála. Bhí sé an-'contrived'. Bhí gach ceann desna freagraí sa chlár teilifíse bunaithe ar a shaol - is féidir le leanbh scéal mar sin a scríobh.

Stollaire

topper75 wrote: »

An-leadránach. Téigigí go ceann eile.

Cad is brí leis an damhsa ag an deireadh? Magadh an ea? Scannáin le gach rud ann agus ní raibh faic ann i ndeireadh na dála. Bhí sé an-'contrived'. Bhí gach ceann desna freagraí sa chlár teilifíse bunaithe ar a shaol - is féidir le leanbh scéal mar sin a scríobh.

Tagaim le topper75 ar seo.
Ní thuigim an ruaille buaille go léir faoin gceann seo, ar chor ar bith.

Múinteoir

Hannibal Rising - Níos fearr ná mar a bhí mé ag súil leis. Insítear scéal inchreidte suimiúil faoi fhorbairt Hannibal Lecter ó pháiste/fhear óg go canablach craiceáilte. An rud is aistí faoin scannán (agus an rud is míshuaimhní, dar liom) ná go mbíonn an oiread sin bá agat leis agus é ag marú na ndaoine seo go brúidiúil. - 7/10

Stollaire

Valkyrie

Scannán stairiúil lonnaithe i nGearmáin na Naitsithe le linn an Dara Cogadh Domhanda atá ann. Scéal faoin choirnéal Claus von Stauffenberg (Tomáisín Crús) agus a iarrachtaí rialtas Hitler a scriosadh.
Scéal spéisiúil agus tábhachtach fiú, b'fhéidir scéal ó WW2 ina bhféadfadh Gearmánaigh a bheith bródúil as .i. Gearmánaigh ag troid ar son cirt le linn na tréimhse is náirí i stáir na tíre sin.

Ceann measartha maith, mholfainn é is dóigh.

7 as 10

topper75

Ceann fíor-Iodáileach é seo faoin an coir eagraithe i Campania leis an 'Camorra'. Ní ghnáth-dráma atá ann agus ní ghnáth-clár fhaisnéise atá ann ach oiread, ach meascán idir an dhá chinn acu. Cruthaíonn siad pictiúr do domhan uafásach, gráinneach ina bhfuil an láidreacht agus an foiréigin ar barr, agus níl aon dul as. Insíonn siad scéalta cúpla áititheoirí éagsula, nach bhfuil aon nasc eatarthu. Ní raibh mórán spraoi ann agus beidh tú sásta go leor is tú ag teacht amach as an pictiúrlann go bhfuil tú i do chonaí in Éireann seachas Naples.

Múinteoir

Letters from Iwo Jima

Sár-scannán a stiúir Clint Eastwood as Seapáinis, faoi ionsaí na Meiriceánach ar oileán Iwo Jima le linn an Dara Cogadh Domhanda agus é inste ó dhearcadh na saighdiúirí Seapánacha. Léirítear daonnacht an dá thaobh ar bhealach thar a bheith réalaíoch agus báúil, ionas go dtuigimid go soiléir cé chomh craiceáilte is atá cogaíocht agus gur beag an difear atá idir saighdiúir ar thaobh amháin ná ar thaobh eile. Is deacair talann Clint Eastwood a shárú mar stiúrthóir, is dóigh liom. 8.5/10

Stollaire

Múinteoir wrote: »

Letters from Iwo Jima

Sár-scannán a stiúir Clint Eastwood as Seapáinis, faoi ionsaí na Meiriceánach ar oileán Iwo Jima le linn an Dara Cogadh Domhanda agus é inste ó dhearcadh na saighdiúirí Seapánacha. Léirítear daonnacht an dá thaobh ar bhealach thar a bheith réalaíoch agus báúil, ionas go dtuigimid go soiléir cé chomh craiceáilte is atá cogaíocht agus gur beag an difear atá idir saighdiúir ar thaobh amháin ná ar thaobh eile. Is deacair talann Clint Eastwood a shárú mar stiúrthóir, is dóigh liom. 8.5/10

Thaitin an ceann sin go mór liom freisin, tá sé níos fearr ná Flags of Our Fathers i mo thuairim

Hot Rod 2 as 10

Scannán grinn atá go hiomlán áiféiseach, faigheann sé pointe toisc go bhfuil Isla Fisher ann agus pointe eile de bharr an cheoil.

Don't Mess with the Zohan 1 as 10

Seafóid. Faigheann sé pointe i ngeall ar na radharcanna oscailte

Múinteoir

Stollaire wrote: »

Don't Mess with the Zohan 1 as 10

Seafóid. Faigheann sé pointe i ngeall ar na radharcanna oscailte

Ba leor an réamhbhlaiseadh a chonaic mé chun an ruaig a chur orm!

Múinteoir

Mheas mé go raibh an scannán seo thar barr, ós rud é go bhfuil suim mhór agam i gcúrsaí polaitíochta. Bhí Frank Langella thar cionn agus é ag glacadh páirte Richard Nixon, iar-uachtarán faoi náire, a bhí ag iarraidh a dhea-chlú a shaothrú arís, trí shraith agallamh a dhéanamh leis an agallóir Sasanach, David Frost. Má tá suim ar bith agat i gcúrsaí staire agus polaitíochta Mheiriceá, beidh tú thar a bheith sásta leis an gceann seo. - 9/10


Dála an scéil, tá sleachta de na hagallaimh bhunaidh a rinne Nixon le Frost, le fáil ar youtube.

Poll Dubh

The Painted Veil



Scéal grá é seo lonnaithe sa chianoirthear sna fichidí. Pósann na príomhcharachtair Edward Norton agus Naomi Watts ar chúiseanna míchearta agus níl sé fada go dtarlaíonn mídhílseacht, agus ansin díoltas. Agus iad i mbun aighnis, bíonn orthu plé le heipidéim chalair i gceantar iargúlta den tSín, áit a bhfuil gráin ar bhunaidh na háite roimh dhaoine geala cosúil leofa mar gheall go bhfuil an tír faoi riail choilíneach.

Thaitin an scannán seo go mór liom. Tá na radhairc ar an tírdhreach go hálainn agus déanann Norton agus Watts beirt go maith ina bpáirteanna (cé go bhfuil Watts píosa beag ró-shean b'fhéidir). Tá an scéal díreach agus simplí ach fós féin tá sé atmaisféarach agus taitneamhach. 7/10

Má tá tú ag fanacht istigh anocht le do pháirtí, molaim an ceann seo mar tá sé rómánsach gan a bheith 'cailíneach' má thuigeann tú mé.

Stollaire

Death Race 6 as 10

Scannán maith aicsin lán beibeanna, rásaíochta carranna is foréigin .
Cheap mé go mbeadh sé áiféiseach ar fad ach bhí sé go maith, mholfainn é...do bhuachaillí.

Stollaire

Le scaphandre et le papillon nó The Diving Bell and the Butterfly:
7 as 10 (i mo thuairim)

Scéal Jean-Dominique Bauby, iriseoir Francach a d'fhulaing stróc a d'fhág é gan ghluaiseacht ina chorp seachas a shúil chlé.
D'inis sé a scéal le caochadh a shúile.

Ceann spéisiúil atá stiúrtha go galánta ar fad ach atá beagáinín gruama.
Mholfainn é.

Stollaire

Ar eagla na heagla, agus ní chuimhním ar chuir mé léirmheas suas ar an tsuíomh seo ina leith roimhe, ach ba chóir do chuile dhuine an scannán Righteous kill a sheachaint. Tugaim an rabhadh seo toisc go bhfeicim go bhfuil a lán poiblíochta faoi le déanaí.
Ach seo an scannán is measa ariamh.

Tá an rabhadh agaibh.

Tulyar

Scannán maith ó Woody Allen. Is breá liom obair Woody agus bhíos ag súil go mór leis an scannán seo. Bhainis ard thaitneamh as.

Is dlúthchairde iad Vicky agus Cristina a chaitheann Samhradh iomlán i mBarcelona. Ach ní mar a chéile iad áfach ó thaobh meoin agus pearsantachta dhe.
Is duine caomhnach í Vicky. Tá sí stuama agus staidéartha. Ní maith lei bheith ag dul sa tseans. Tá sí geallta. Déanann sí gach iarracht a bheith dilís dá fear.
Is duine liobrálach í Cristina. Is breá leí a rogha rud a dhéanamh. Tá sí abharaín ainsrianta.
Buaileann siad le ealaíontóir mealltach dathúil - Juan Antonio. Tá tarraingt do shrianta ag an bhfear seo ar na mná. Mealltóir ban amach is amach is ea é. Tá sé thar a bheith magarlach. Buaileann an bheirt bhean leathar leis.
Tháinig fuarallas trí Cristine amach agus borradh adhaill trí gach ball dá corp nuair a leag sí súil ar Juan. D'fhéach sí air ar bhealach craiceannach.
Níor theastaigh ó Vicky leathar a bhualadh le Juan ach i ndeireadh na dála ghéill sí.
Ansin buailimid le bean Juan - Maria Helena (Penelope Cruz). A leithéid de bhean - í fad chosach, dea chíochach agus uasal chumtha. Ach bhí sí glan as a meabhair agus ar buile. Bhíodh caint gan éifeacht ar siúl aici le linn a mearbhaill.
Má sea feictear ceathrar phríomh charachtar atá eagsúil óna chéile sa scannán ach fós fite fuaite ina chéile. Tá na mion charachtair suimiúil freisin.
Tá an-jab déanta ag Woody Allen sa scannán seo. Pléann sé dearcaidh eagsúla i leith an ghrá agus na rómánsaíochta.
An taon locht a bheadh agam ar an scannán ná gur cheapas go mbeadh níos mó de bhréathacht Barcelona le feiceáil.

Stollaire

Níl a fhios agam cad é faoin scéal sin a chuireann isteach go mór orm, b'fhéidir an chaoi a mbeadh mná chomh héasca!

Múinteoir

Gran Torino



Sár-dhráma ó dhuine de na stiúrthóirí/aisteoirí is fearr dá bhfuil ann; agus tá sé 78 bliain d'aois! Go maire sé an céad agus téigí féin ag an scannán seo! 9/10*

*An t-aon locht atá agam ar an scannán seo ná nach raibh aisteoireacht na beirte óige go ró-mhaith, ach níor leor sin chun fiúntas an scannáin a laghdú.

Stollaire

Múinteoir wrote: »

Gran Torino

Sár-dhráma ó dhuine de na stiúrthóirí/aisteoirí is fearr dá bhfuil ann; agus tá sé 78 bliain d'aois! Go maire sé an céad agus téigí féin ag an scannán seo! 9/10*

*An t-aon locht atá agam ar an scannán seo ná nach raibh aisteoireacht na beirte óige go ró-mhaith, ach níor leor sin chun fiúntas an scannáin a laghdú.

Níor chuala mé ach rudaí maithe faoin gceann seo.

Agus níor chuala mé ach drochrudaí faoi scannán The Curious Case of Benjamin Button;
Ach cheap mé féin go raibh sé go maith.
Cíorann an scéal an saol agus caoi nach maireann muid ach seal.
Tá taispeántais láidre ann ó Phitt agus Blanchett mar is dual dóibh
7/10

Stollaire

Pride & Glory

Scannán aicsin teannais faoi Ghael-Mheiriceánaigh atá sa bhfórsa póilíneachta in Nua Eabhrac. Fórsa atá beagnach go hiomlán salach i ngeall ar chaimiléireacht agus coiriúlacht atá ann.
Imríonn Cóilín Ó Fearúil an garda truaillithe foréigneach Jimmy Eagan, tá Éamonn Ó Neachtain ann mar an cop maith Ray Tierney.
Agus tá an scannán bunaithe ar a n-iarrachtaí teacht ar choirpeach eile agus na fadhbanna a chruthaítear dóibh nuair a thagann an fhírinne amach.

Sílim go raibh sé go maith, ach d'airigh mé go bhfaca mé roimhe é, má thuigeann tú leat mé. Cheapas gur thosaigh an scannán ag tarraingt na gcos tar éis tamaill agus go raibh an chríoch beagáinín lag.

Ceann measartha 6 as 10

Tulyar

Sár-dhráma ó dhuine de na stiúrthóirí/aisteoirí is fearr dá bhfuil ann; agus tá sé 78 bliain d'aois! Go maire sé an céad agus téigí féin ag an scannán seo! 9/10*

Tagaim leat a Mhúinteoir.Tá Gran Torino ar cheann de na scannáin is bréatha ina dhéantús agus ina chur le chéile dá bhfaca le fada.
Bhaineas ard thaitneamh as. Éiríonn go seoigh le Clint Eastwood an dá thráigh a fhreastal mar ní hamháin go bhfuil mianach ann
mar aisteoir ach tá sé go diail mar stiúrthóir. Ón tús bhíos húcáilte ag draíocht an scannáin. Seasann an scannán seo amach ar son a chríochnúlacht agus a cheardaíocht.

Stollaire

Watchmen

Lonnaithe i Meiriceá i lár na hochtóidí, ach mar gheall ar thionchar na sárlaochra(Watchmen) chuaigh stair na stáit i dtreo eile. Tá Nixon fós in oifig. Agus tá cogadh núicléach á bhagairt ar an domhan idir SAM agus an USSR.

Scannán fíor-spéisiúil galánta atá sa gceann seo, i mo thuairim. Agus an t-aon rud atá cinnte faoi ná beidh tuairimí difriúla ag chuile mhac mháthair ina leith.
Má tá tú ag súil le scannán sárlaochra ar nós Superman/Spiderman nó Fantastic Four bheadh dul amú orm.
Seo scannán fada, duairc, dáiríre agus lán foréigin.

Beidh, agus sílim go bhfuil, daoine ag rá go bhfanann an scannán seo ró-dhílis don ghreannán bunaidh. Seafóid. Buíochas le Dia d'fhan siad dílis agus i ngeall ar sin tá cult-clasaic ar an toirt againn. Ní dhéantar iarracht an script nó an scéal a lagú ar chor ar bith, ach is dóigh mar sin, seans nach bhfuil an scannán seo oiriúnach don ghnáth lucht féachana i ndáiríre.

I mo thuairim 8.5 as 10

Ach déarfainn go dtabharfaidh a lán 5 nó 6 as 10 air.

Tá grádú 16 ar an gceann seo ach ba chóir go mbeadh grádú 18 air. Chonac a lán páistí agus a dtuismitheoirí ag fágáil de bharr foréigin agus gnéis sa scannán.

Stollaire

Rec

http://www.youtube.com/watch?v=ib5ZSj6ST0U

Má thaitníonn scannán zombaithe leat ba bhreá leatsa an ceann seo ón Spáinn.
Tá réalaíoch aisteach thar na bearta ag baint leis, agus bainfidh sé geit nó dhó asat, go háirithe a dheireadh!
Déarfainn go bhfuil an stíl ar nós blair Witch aige .i. tá sé á scannánú ag foireann nuachta agus feicimid cad atá ag tarlú tríd an gceamara. Ach san áit ar theip stiúrthóirí is léiritheoirí Blair Witch, agus scannáin eile nach iad, leis an stíl seo tá sé á láimhseáil go paiteanta ag na stiúrthóirí Spáinneacha Jaume Balagueró agus Paco Plaza.

Scannán Zombaithe thar barr, 7 as 10

Múinteoir

World Trade Center



Scannán faoi na daoine tarrthála a gortaíodh agus a fuair bás le linn 9/11, agus Nicholas Cage sa phríomhpháirt. Cé go raibh rithim an scéil agus an aisteoireacht maith go leor san iarracht seo, bhí sé an-chosúil le United 93, sa chaoi gur thuig tú céard go díreach a tharla agus céard a tharlóidh sa scannán, ós rud é go bhfuil na scéalta go léir faoi 9/11 feicthe agus cloiste againn cheana.

Nuair nach bhfuil aon rud nua le feiceáil ná le cloisteáil, bíonn cuma cineál leamh ar an scannán, fiú más táirge maith é mar scannán. Chonaic mé ar an teilifís aréir é. B'fhiú féachaint air ar an teilifís ach ní fhéachfá air an dara huair, dar liom. 6/10

Seo an réamhbhlaiseadh ar youtube.

Poll Dubh

Bhí mé ag breathnú ar <br>Night at the Museum<br/>, an chéad cheann, ar an mbosca aréir. Bhí sé taitneamhach go leor ach ghoill rud amháin orm. Ba músaem stair an dúlra é agus bhí mamaigh na hAfraice ann agus dineasáir ann ceart go leor. Ach in ainm Dé cén fáth go raibh na Rómhánaigh, Atilla an Hun, Teddy Roosevelt srl. le fáil i músaem dúlra. An gceapann lucht Hollywood nach dtabharfadh muid sin faoi deara?

topper75

Poll Dubh wrote: »

cén fáth go raibh na Rómhánaigh, Atilla an Hun, Teddy Roosevelt srl. le fáil i músaem dúlra. An gceapann lucht Hollywood nach dtabharfadh muid sin faoi deara?

Bhfuel, chun a bheith cóir dóibh, tá Roosevelt ann sa cheann in Nua Eabhrac. Bhí baint mór aig leis an dúlra sna Stáit agus an gluaiseacht caomhnacháin (conservation movement?). Tá dealbh de agus é ar dhroim chapaill ós comhair an músaem in aice le Central Park. Na boic eile? sea - b'fhéidir go raibh sé sin amaideach.
Níor bhain mé mórán sult as an scannáin sin mar a tharlaíonn sé.

Poll Dubh

topper75 wrote: »

Níor bhain mé mórán sult as an scannáin sin mar a tharlaíonn sé.

Tá mo chaighdeánaithe sách íseal agus mé sínithe amach ar an tolg Dé Domhnaigh agus leathbhuidéal fíona ionam.

Múinteoir

Tar éis dom súil a chaitheamh ar na nuachtáin is déanaí, is léir nach dtaitníonn an dara scannán sa tsraith leis na léirmheastóirí, cibé ar bith!

Samildánach

Is mór an béim a chuirtear sa scannánaíocht (gearr agus fada) ó thaobh chur chun cinn agus bláth na Gaeilge.

Is iontach an meán é chun gluaiseanna a chur in iúl agus chun ardáin nua a thabhairt le litríocht na Gaeil, sílim. Cad é an saothar Gaelach ab fhearr libh?

Ar an ábhar, an bhfuil 'Seachd' an scannán Albanach feicthe agaibh go dtí seo? D'fheicfidís é saor in aice sa ceangal seo:
http://www.youtube.com/watch?v=x_SlaG9KGX8
Tá sé ar fad sa Ghaidhlig gan fotheideal faraor! Ach is aoibhinn an scannán in ainneoin sin. Cuireann sé i gcéill dúinn an ceangal láidir idir na Gaeil anseo agus na Gaeil thall. Léargas/Taighde sách mar aon leis sin ar an teanga féin, aithneoidh sibh cuid den chaint.
Agus an ceol? Dár m'anam, an cheol ba bhinne a chloisfeá go deo!

Stollaire

Samildánach wrote: »

Is mór an béim a chuirtear sa scannánaíocht (gearr agus fada) ó thaobh chur chun cinn agus bláth na Gaeilge.

Is iontach an meán é chun gluaiseanna a chur in iúl agus chun ardáin nua a thabhairt le litríocht na Gaeil, sílim. Cad é an saothar Gaelach ab fhearr libh?

Ar an ábhar, an bhfuil 'Seachd' an scannán Albanach feicthe agaibh go dtí seo? D'fheicfidís é saor in aice sa ceangal seo:
http://www.youtube.com/watch?v=x_SlaG9KGX8
Tá sé ar fad sa Ghaidhlig gan fotheideal faraor! Ach is aoibhinn an scannán in ainneoin sin. Cuireann sé i gcéill dúinn an ceangal láidir idir na Gaeil anseo agus na Gaeil thall. Léargas/Taighde sách mar aon leis sin ar an teanga féin, aithneoidh sibh cuid den chaint.
Agus an ceol? Dár m'anam, an cheol ba bhinne a chloisfeá go deo!

go raibh maith agat a chara, bhaineas an-sult as, fiú mura raibh mé in ann chuile ní á rá acu a thuiscint.

Stollaire

X-Men Origins: Wolverine

Scéal lag, scannán leadránach, CG lag.

3 as 10

Múinteoir

Ghandi (1982), leis an stiúrthóir Richard Attenborough.

Mheas mé gur éirigh go maith leis an scannán seo an bunús daonna a bhí leis an bhfonn a bhí ar Ghandi cur i gcoinne na géarleanúna a bhí ar siúl san impireacht a léiriú (caitear amach as traein é ag tús an scannáin, nuair a dhiúltaíonn sé a shuíochán chéad aicme a ghéilleadh mar gheall ar dhath a chraicinn). Taispeántar chomh maith nach raibh sé éasca an foréigean a sheachaint go polaitiúil, fiú má bhí Ghandi féin ina choinne.

Ach bhí sé deacair go leor na pearsantachtaí agus na heachtraí staire go léir a leanúint uaireanta (fiú mar dhuine a bhfuil suim mhór aige sa stair) agus mar a admhaítear ag tús an scannáin, tá sé sár-dheacair scéal iomlán duine a insint i scannán amháin, fiú má mhaireann an scannán sin ar feadh trí huaire.

Ach i ndeireadh na dála, shíl mé go raibh Ben Kingsley gan locht i bpáirt Ghandi.

7.5/10

Stollaire

The Wrestler

Taispeántas maith ó Rourke, scéal simplí dea-scríofa: 7.5 as 10 i mo thuairim.

Role Models

Scannán grinn, mar dhea! Níor bhain sé mórán gáirí asam ar aon nós. scéal ró-shimplí droch-scríofa: 4 as 10 i mo thuairim

Stollaire

Che cuid a 1. (7 as 10)

Scannán stairiúil faoi Ernesto "Che" Guevara. Carachtair fíor-spéisiúil atá ann is cuma cén dearcadh atá agat ar pholaitíocht s'aigesean.
Scannán taitneamhach go deimhin a thugann léargas ar eachtraí an réabhlóidí Mharxaigh i gCúba agus é i dteannta le Raúl agus Fidel Castro.
D'fhéadfaí a rá go leanann an scéal ón áit a gcríochnaíonn an scannán iontach sin "Diarios de Motocicleta"
Sár taispeántas ar fad ó Benicio Del Toro atá i bpáirt Ernesto.

Che cuid a 2. (5.5 as 10)

Baineann an dara pháirt den scéal leis an am a chaith sé sa mBolaiv ag iarraidh éirí amach sóisialach a thosú mar a rinneadh i gCúba.
Níl sé chomh maith mar an chéad scannán, ach fós is fiú é a fheiceáil.

Múinteoir

Air Force One

Bhí sé ar an teilifís aréir. Scannán aicsin ráiméiseach de chuid na heite deise agus níl cur síos ar a olcas is a bhí an dialóg. Cac iomlán a bhí ann. 2/10

topper75

Múinteoir wrote: »

Scannán aicsin ráiméiseach de chuid na heite deise

GOA:pac:

SÁM abú! Ba chóir dóibh rabhadh a chur leis do na liobrálaithe bándearg.

Stollaire

Múinteoir wrote: »

Air Force One

Bhí sé ar an teilifís aréir. Scannán aicsin ráiméiseach de chuid na heite deise agus níl cur síos ar a olcas is a bhí an dialóg. Cac iomlán a bhí ann. 2/10

Aon ní déanta ag Michael Bay, faigheann sé 2 as a 10 ar an toirt freisin.

U.S.A, U.S.A, U.S.A.....

Poll Dubh

Stollaire wrote: »

Aon ní déanta ag Michael Bay, faigheann sé 2 as a 10 ar an toirt freisin.

U.S.A, U.S.A, U.S.A.....

Chonaic mé na blianta ó shin agus tá 'Faigh amach as m'eitleán!' fós greanta ar m'inchinn.

Múinteoir

Inglourious Basterds, le Quentin Tarantino.

Má thaitin na scannáin atá déanta ag Tarantino go dtí seo leat, beidh tú thar a bheith sásta leis seo. Bhí go leor cor sa scéal agus mheas mé go raibh Brad Pitt thar barr sa pháirt a bhí aige.

Rud amháin a thaitin liom go mór ná go raibh thart ar leath de, nó níos mó as Fraincis agus as Gearmáinis agus an chuid eile trí Bhéarla. Ní raibh mé ag súil leis an réalachas teanga seo ó scannán de chuid Hollywood agus chuaigh sé i bhfeidhm orm go mór.

Mar is dual do Tarantino, tá go leor foréigin, fola agus putóg ar fud an scannáin, mar sin ní mholfainn duit dul chuige má chuireann a leithéid masmas ort.

Ar an drochuair, ní róshásta a bhí mé leis an athscríobh a rinne Tarantino ar stair an Dara Cogadh Domhanda (is gá é a fheiceáil chun é a chreidiúint!), ach bhí in ann taitneamh a bhaint as mar scéal, go háirithe as an ngreann duairc a bhí fite fuaite tríd.

7.5/10

civis_liberalis

Thaitin Inglorious go mór liom. Ní raibh mé ag súil le sin.

Tá scannán "mór le rá" ag teacht amach go gairid... Leap Year. Tá páirt beag ag Macdara Ó Fátharta ann mar sagart Éireannach is cosúil.

Is Sasanach an príomhaisteoir fireann, cé gur Éireannach atá sa carachtar. Níl mé chun é sin a chur ina haghaidh áfach, mar cheap mé go raibh sé go maith sa scannán "The Lookout". Chonaic mé Peadar Lamb sa réamhbhlaiseadh freisin, in éineacht le neart steiréitíopaí a chuireann ina luí ar na yanks nach bhfuil in Éirinn fós ach feirm mór, le carranna ó na seascaidí...


Tá an leantóir le feiceáil anseo...

https://www.youtube.com/watch?v=Argw8RXNREk

dolliemix

civis_liberalis wrote: »

Thaitin Inglorious go mór liom. Ní raibh mé ag súil le sin.

Tá scannán "mór le rá" ag teacht amach go gairid... Leap Year. Tá páirt beag ag Macdara Ó Fátharta ann mar sagart Éireannach is cosúil.

Is Sasanach an príomhaisteoir fireann, cé gur Éireannach atá sa carachtar. Níl mé chun é sin a chur ina haghaidh áfach, mar cheap mé go raibh sé go maith sa scannán "The Lookout". Chonaic mé Peadar Lamb sa réamhbhlaiseadh freisin, in éineacht le neart steiréitíopaí a chuireann ina luí ar na yanks nach bhfuil in Éirinn fós ach feirm mór, le carranna ó na seascaidí...


Tá an leantóir le feiceáil anseo...

https://www.youtube.com/watch?v=Argw8RXNREk

lol! An fear bainne, Pat Mustard ó Fr Ted ag 48 soicind :D:D

civis_liberalis

dolliemix wrote: »

lol! An fear bainne, Pat Mustard ó Fr Ted ag 48 soicind :D:D

Míshásta

Á bejapers is begorrah.

Ní rabhas ró-thógtha leis an leantóir ná le roinnt léirmheasanna a léigheas. Is cosúil go raibh an cailín saonta ag taisteal ar shaghas inneal ama in ionad eitleáin mar d'imigh sí ó na Stáit chomhaimseartha agus thuirling ar thalamh naofa na hÉireann am éigin sna luath caogadaí den aois a d'imigh tharainn. An bhfaca sibh an páipéar falla, cá bhfuaireadar é? - agus an leaba práis. "Ye two are married aren't ye?" Bhí an t-iomad eachtraí eile lán-dochreidte sa leantóir gearr, eitleán dibheartáilte go dtí Cardiff. Ba mhaith liom a fháilt amach conas ar éirigh léi a bheith sáinnithe in áit éigin iargúlta gan phríomh-bhóithre ná córas leictreachais ceart ar a bhealach go BáC.

Tá's agam ná fuil ann ach chic-flic rómánsúil, agus gur ceart dom mo shamhlaíocht a scaoileadh saor sa phictiúrlann ach táim braon bailithe den bhréag-íomhá sean-chaite Hollywood seo d'Eirinn agu dá muintir.

Ach tá an tírdreach go hálainn de réir dealraimh - is dócha go gcabhródh sé le tuilleadh turasóirí a mhealladh anseo, go bhfóire Dia orainn.

Stollaire

Dhá scannán a bhfaca mé le déanaí agus a mholfainn go mór.

Avatar 3D: Thabharfainn 9 as 10 don scannán seo, tá sé ar fheabhas ar fad. Ba chóir an ceann seo a fheiceáil sa phictiúrlann, le haghaidh na 3D.
http://www.youtube.com/watch?v=cRdxXPV9GNQ

The Road: I ndiaidh Avatar tá an cuma leadránach ar chuile rud mar sin tá gá ag scannáin le scéal agus script mhaith. Tá scéal is script iontach ag The Ród. 7 as 10, i mo thuairim.
http://www.youtube.com/watch?v=hbLgszfXTAY

civis_liberalis

Míshásta wrote: »

Ach tá an tírdreach go hálainn de réir dealraimh - is dócha go gcabhródh sé le tuilleadh turasóirí a mhealladh anseo, go bhfóire Dia orainn.

Yanks amach! Sin a deirimse

civis_liberalis

Fanfaidh mé leis an BluRay do Avatar.

Cloisim rudaí iontacha faoi The Road freisin. Is cosúil go bhfuil Oscar tuillte ag an athair sa scéal. Níl sé feicthe agam fós.

Stollaire

civis_liberalis wrote: »

Fanfaidh mé leis an BluRay do Avatar.

Cloisim rudaí iontacha faoi The Road freisin. Is cosúil go bhfuil Oscar tuillte ag an athair sa scéal. Níl sé feicthe agam fós.

Ná fan. Seo ceann gur chóir duit a fheiceáil i 3D.

civis_liberalis

Stollaire wrote: »

Ná fan. Seo ceann gur chóir duit a fheiceáil i 3D.

Meh, níl cónaí orm sa chathair agus táim ró-leisciúil dul in aon áit, go háirithe san aimsir seo.

Múinteoir

Má d'fhás tú aníos sna hochtóidí, is maith an seans go mbeadh suim agat sa leagan scannáin nua de The A-Team. Tá an réamhbhlaiseadh díreach eisithe ar YouTube. Níl a fhios agam go fóill cén uair a eiseofar an scannán féin.

http://www.youtube.com/watch?v=LoILTG8UF-A

(An bhfuil éinne in ann a mhíniú dom cén fáth nach mbíonn aon rud le feiceáil ach spás bán nuair a chuirim

https://www.youtube.com/watch?v=

thart timpeall ar an seoladh? )

Stollaire

Rampage Jackson mar B.A. Baracus, sin rogha iontach ar fad.

Ach, théis an réamhbhlaiste sin a bhreathnú caithfidh mé a rá nach bhfuilim ró-chinnte an mbeidh sé go maith.
Agus cosúil le cách bhíos i mo fan mór agus mé i mo ghasúr, bhíodh puball den veain agam fiú!


Beidh le feiceáil is dóigh...
Tá an baol ann go bhfuilim ag éirí sean.

An bhfuil éinne in ann a mhíniú dom cén fáth nach mbíonn aon rud le feiceáil ach spás bán nuair a chuirim thart timpeall ar an seoladh?

Táid ag déanamh seo anois le chuile réamhbhlaiseadh, bíonn "Embedding disabled by request" orthu go léir ar You Tube. Níl a fhios agam cén fáth.

Múinteoir

Bímse féin go mór in amhras faoi scannán ar bith a dhéantar as clár teilifíse rathúil de ghnáth. Ach tá mé beagáinín níos dóchasaí faoin gceann seo toisc go dtaitníonn rogha na n-aisteoirí sna páirteanna éagsúla liom. I ndeireadh na dála, ní fhéadfadh sé a bheith mórán níos áiféisí ná an clár teilifíse féin!

Stollaire wrote: »

Táid ag déanamh seo anois le chuile réamhbhlaiseadh, bíonn "Embedding disabled by request" orthu go léir ar You Tube. Níl a fhios agam cén fáth.

Á tuigim, a dhuine. Go raibh maith agat. Fadhb le YouTube atá ann mar sin agus ní le boards.ie